Maya

Pending

Da Wikipedia, l'enciclopedia libara.

Stato della versione della pagina

Le modifiche in sospeso le vien mostra su sta pagina

La version stabile la xe sta verifega el 9 set 2024. Ghe xe canbiamenti a modeli e/o file in sta version in atexa de revixion.

Maya
Area de rezidensia

Tipo	sivilta, grupo, sivilta antiga e sivilta precolonbiana
Periodo	mileni II v.C. - 1521
Orizenario de	penizola del Yucatan
Continente	america sentrale

I antighi maya i zera stai na popolasion rezidensiada in Mezoamerica andove i ghea desvilupa na sivilta conosesta par l'arte, par l'architetura, par i rafinai sistemi matemateghi e astronomeghi, e par la scritura, l'ugnolo sistema publego de scritura totalmente desvilupa inte le Americhe precolonbiane. La sivilta dei maya la se ga desvilupa in na zona che la include l'odierno sudest mesegan, el Guatemala e el Belize, oltre che parte osidentali de l'Honduras e de El Salvador. Sta rejon la ze formada da le pianure del nord, incluenti la penizola del Yucatan, dai altipiani de la Sierra Madre, che i se estensiona dal stato mesegan del Chiapas verso tuto el sud del Guatemala e dopo in El Salvador, e da le pianure meridionali de le coste del Pasifego.

Durante del periodo preclasego, sta sivilta la ghea costituio le prime comunita stansiali e la ga adota la cultivasion dei alimenti che i zera devegnesti baze de la so alimentasion, intra sti cua mais, fazoli, suche e pearonsini. Le prime sita maya le se ghea desvilupa intra el 750 v.C. e el 500 v.C. e ste cua le vantava architeture monumentali, cofa i grandi tenpli inbelii da elaborae faciade in stuco. La scritura zeroglifega la ze sta doparada partindo dal III secolo v.C. Inte el tardo periodo preclasego, na serie de grandi sita le zera creseste inte la Conca de Peten e Kaminaljuyu el zera devegnesto un sentro tanto inportante inte i altipiani del Guatemala. Co l'avegnensa de le costrusion dei monumenti scolpii co le date del longo conputo, avegnesto da torno al 250 d.C., se ghe fa coinsidar el scumisio del periodo clasego.

Sto periodo el ghea vedesto i Maya fondar numarevule sita-stato ligae da na densa rete comerciale. Du sita rivali, Tikal e Calakmul, le zera devegneste tanto potente. El periodo clasego el ze sta carateriza anca da l'intervento intruzivo de la sita mesegana de Teotihuacan inte la so pulitega dinastega. Inte el IX secolo el ghe ze sta un difondesto colaso pulitego inte la rejon sentrale che el ghea porta a na guera sivile co un consevente sbandono de le sita e un spostamento verso nord de la popolasion. El sevente periodo postclasego, el ghea vedesto levarse-su verso nord l'insediamento de Chichen Itza e l'espansion de l'agresivo regno Quiche de Q'umarkaj inte le rejon colinari del Guatemala. Inte el XVI secolo, l'inpero spagnolo el ghea coloniza la rejon mezoamericana e, dopo de na longa serie de canpagne militari, l'ultema sita maya la zera casca definitivamente inte el 1697.

La leje del periodo clasego la ze sta sentrada da torno del conceto de "re divinita", che el oparava cofa mediador intra i mortali e el regno soranadurale. El podere sovran el zera patrilineare e el vegnea normalmente pasa al fiolo pi grando. La pulitega maya la ze sta caraterizada da un sistema sara de patrona, anca se el precizo sistema aministrativo el variava da na sita-stato a chel'altra. Verso de la fine del periodo clasego, i partegnenti a l'aristocrasia i zera rezultai numaregamente aumentai, co un consevente sbasamento del podere escluzivo del re divin. La sivilta maya la ga desvilupa forme de arte altamente sofisticae, doparando par le so opare materiali sia deperibili che no deperibili, intra sti cua legno, la jada, l'osidiana, la ceramega, la piera scolpia, i stuchi e i freschi finemente depinzesti.

Le sita maya le tendea spanderse cazualmente e el sentro sitadin el zera ocupa da conplesi comerciali e aministrativi, co tuto torno na serie de cuartieri rezidensiali edificai dezordenadamente. De frecuente, varie zone de la sita le zera ligae da strade elevae. Le costrusion prinsipali i zera i palasi, i tenpli-piramide, i canpi par el Zugo de la bala e le struture dedicae a l'oservasion astronomega. La clase elitaria maya la zera bona de lezar e scrivar e la ga desvilupa un conpleso sistema de scritura zeroglifega che la ze sta la pi vansada de le Americhe precolonbiane. I Maya i ghea colzesto-su la so storia e la so conosensa in racuanti libri, dei cuali ghene resta solche tre ezenplari, i restanti i zera stai desfai dai spagnoli. Tutavia le ghe ze anca un gran numaro de testimonianse catae-fora in stele e cerameghe. I Maya i ghea desvilupa un sistema altamente conpleso de calendari rituali e la so matematega la includea uno dei primi cazi de zero esplisito inte el mondo.