Balanit

Vikipediya, erkin ensiklopediya

Balanit, balanopostit (yunoncha balanos - jinsiy olatning bosh qismi; itis; balanoposthitis) - jinsiy olat (zakar) bosh qismi terisi (balanit) va chekka kertmagi ichki qavatining yallig`lanishi bo`ladi(balanopostit). Ko`proq bolalarda olat boshi qisilib, chiqmay qolgan hollarda kuzatiladi (qarang Fimoz). Birlamchi va ikkilamchi balanit uchraydi. Olat chekka kertmagining kambar bo`lishi, unda siydik tomchisi yoki smegma to`planib qolib, unga mikroblar tushishi, shuningdek uretrit, qand kasalligi va boshqa natijasida vujudga kelishi mumkin. So`zak, zaxm asoratlari, fimoz ham balanitga sabab bo`ladi. Olat boshi sohasi shishib, qizaradi, maddalaydi, achishish, qichishish alomatlari paydo bo`lib, bu ayniqsa bemor siygandan keyin zo`rayadi. Lohaslik, bosh og`rig`i, haroratning ko`tarilishi, ba'zan chov sohasidagi limfa tugunlarining kattalashishi kuzatiladi. Balanitning oddiy, diabetik, gangrenoz, halqasimon, eroziyali, yiring-yarali xillari bor. Kasallikning ilk alomatlari paydo bo`lganda, darhol urolog-vrachga (siydik a'zolari mutaxassisi) uchrashish zarur. Kasallikning kechishi va xiliga qarab davo tayinlanadi, asosan yallig`lanishga qarshi dorilar (antibiotiklar, dezinfeksiyalovchi eritmali vanna va boshqalar) buyuriladi. Og`irroq hollarda jarrohlik usuli qo`llanadi. Balanitning oldini olish uchun o`g`il bolalar gigiyena qoidalariga amal qilishlari, agar fimoz bo`lsa, o`z vaqtida davolatishlari lozim bo`ladi^[1].

Ushbu maqolada O`zbekiston milliy ensiklopediyasi (2000-2005) ma'lumotlaridan foydalanilgan.

Tibbiyotga oid ushbu maqola chaladir. Siz uni boyitib, Vikipediyaga yordam berishingiz mumkin. k m t

Turkumlar::

• Simptom:Bosh og`rig`i
• Tibbiyotga oid chala maqolalar

Yashirin turkum:

• O`zbekiston milliy ensiklopediyasi maqolalari
• Barcha chala maqolalar